ಜನರ ಉಪಯೋಗಕ್ಕೆ ಬರಬೇಕಿದ್ದ ಸಮುದಾಯ ಭವನ ನಿರ್ಲಕ್ಷ್ಯಕ್ಕೆ ಬಲಿ; ಸ್ವಚ್ಛತೆ ಕಾಪಾಡುವಲ್ಲಿಯೂ ಪಂಚಾಯಿತಿ ಆಡಳಿತ ವಿಫಲವೇ?
ಕೊರಟಗೆರೆ ಸಮಾಚಾರ: ಸಾರ್ವಜನಿಕರ ಹಾಗೂ ಸಮುದಾಯದ ಕಾರ್ಯಕ್ರಮಗಳಿಗೆ ಅನುಕೂಲವಾಗಬೇಕಿದ್ದ ಸೇವಾಲಾಲ್ ಭವನವೊಂದು ಕಳೆದ 13–14 ವರ್ಷಗಳಿಂದ ಅಪೂರ್ಣ ಸ್ಥಿತಿಯಲ್ಲೇ ಉಳಿದಿದ್ದು, ಇದೀಗ ಗಿಡಗಂಟಿಗಳಿಂದ ಆವೃತವಾಗಿ ಪಾಳು ಬಿದ್ದಿದೆ. ಮತ್ತೊಂದೆಡೆ, ಭವನದ ಎದುರಿನಲ್ಲೇ ಇರುವ ಸೇವಾಲಾಲ್ ದೇವಸ್ಥಾನದ ಸುತ್ತಮುತ್ತ ಕೊಳಚೆ ನೀರು ಹರಿಯುತ್ತಿದ್ದು, ಸ್ವಚ್ಛತೆಯ ಕೊರತೆ ಎದ್ದು ಕಾಣುತ್ತಿದೆ.
ತಾಲೂಕಿನ ತುಂಬಾಡಿ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಪಕೀರಪ್ಪನ ಪಾಳ್ಯದಲ್ಲಿರುವ ಸೇವಾಲಾಲ್ ಭವನದ ಕಾಮಗಾರಿ ಸುಮಾರು 13–14 ವರ್ಷಗಳ ಹಿಂದೆ ಆರಂಭವಾಗಿತ್ತು. ಆದರೆ ಕಟ್ಟಡ ಕಾಮಗಾರಿ ಅರ್ಧಕ್ಕೆ ನಿಂತಿದ್ದು, ಇಂದಿಗೂ ಪೂರ್ಣಗೊಂಡಿಲ್ಲ. ಸಾರ್ವಜನಿಕರ ಹಣ ವೆಚ್ಚ ಮಾಡಿ ನಿರ್ಮಿಸಲು ಉದ್ದೇಶಿಸಿದ್ದ ಕಟ್ಟಡ ಬಳಕೆಗೆ ಬರುವ ಮೊದಲೇ ನಿರ್ಲಕ್ಷ್ಯಕ್ಕೆ ಒಳಗಾಗಿದೆ.
ಭವನದ ಸುತ್ತ ಗಿಡಗಂಟಿಗಳ ಆವರಣ
ಕಾಮಗಾರಿ ಸ್ಥಗಿತಗೊಂಡ ಬಳಿಕ ಕಟ್ಟಡದ ನಿರ್ವಹಣೆಯೂ ಇಲ್ಲದಂತಾಗಿದೆ. ಸುತ್ತಮುತ್ತ ಗಿಡಗಂಟಿಗಳು ಬೆಳೆದು ಕಟ್ಟಡದ ಆವರಣವನ್ನೇ ಆಕ್ರಮಿಸಿಕೊಂಡಿವೆ. ಭವನದ ಒಳಗೆ ಪ್ರವೇಶಿಸುವುದಕ್ಕೂ ಕಷ್ಟವಾಗುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಸಮುದಾಯದ ಸಭೆ, ಸಾಂಸ್ಕೃತಿಕ ಕಾರ್ಯಕ್ರಮಗಳು ಹಾಗೂ ಇತರ ಸಾರ್ವಜನಿಕ ಚಟುವಟಿಕೆಗಳಿಗೆ ಬಳಕೆಯಾಗಬೇಕಿದ್ದ ಕಟ್ಟಡ ಇಂದು ನಿರುಪಯುಕ್ತವಾಗಿ ಉಳಿದಿದೆ.
ದೇವಸ್ಥಾನದ ಮುಂದೆಯೇ ಕೊಳಚೆ ನೀರಿನ ಹರಿವು!
ಇನ್ನು ಭವನದ ಎದುರುಗಡೆಯಲ್ಲೇ ಸೇವಾಲಾಲ್ ದೇವಸ್ಥಾನವಿದೆ. ಆದರೆ ದೇವಸ್ಥಾನದ ಮುಂಭಾಗದಲ್ಲಿಯೇ ಗ್ರಾಮದ ಕೊಳಚೆ ನೀರು ಹರಿಯುತ್ತಿರುವುದು ಸ್ಥಳೀಯರ ಅಸಮಾಧಾನಕ್ಕೆ ಕಾರಣವಾಗಿದೆ. ಧಾರ್ಮಿಕ ಸ್ಥಳದ ಸುತ್ತಮುತ್ತ ಸ್ವಚ್ಛತೆ ಕಾಪಾಡಬೇಕಾದ ಹೊಣೆಗಾರಿಕೆ ಸಂಬಂಧಪಟ್ಟ ಸ್ಥಳೀಯ ಆಡಳಿತದ ಮೇಲಿದೆ. ಆದರೂ ಈ ಪ್ರದೇಶದಲ್ಲಿ ಸ್ವಚ್ಛತಾ ಕಾರ್ಯಕ್ಕೆ ಆದ್ಯತೆ ನೀಡದಿರುವುದು ಕಂಡುಬರುತ್ತಿದೆ.
ಒಂದೆಡೆ ವರ್ಷಗಳಿಂದ ಪೂರ್ಣಗೊಳ್ಳದ ಸಮುದಾಯ ಭವನ, ಮತ್ತೊಂದೆಡೆ ದೇವಸ್ಥಾನದ ಬಳಿಯೇ ಹರಿಯುತ್ತಿರುವ ಕೊಳಚೆ ನೀರು. ಇವೆರಡೂ ಸ್ಥಳೀಯ ಮೂಲಸೌಕರ್ಯ ಹಾಗೂ ಸ್ವಚ್ಛತಾ ನಿರ್ವಹಣೆಯಲ್ಲಿನ ಲೋಪಗಳನ್ನು ಎತ್ತಿತೋರಿಸುತ್ತಿವೆ.
ಅಧಿಕಾರಿಗಳೇ, ಜನಪ್ರತಿನಿಧಿಗಳೇ, ಗಮನಹರಿಸುವಿರಾ?
ಸುಮಾರು ಒಂದೂವರೆ ದಶಕ ಕಳೆದರೂ ಪೂರ್ಣಗೊಳ್ಳದ ಭವನದ ಕಾಮಗಾರಿಯನ್ನು ಮತ್ತೆ ಆರಂಭಿಸಿ, ಕಟ್ಟಡವನ್ನು ಜನರ ಬಳಕೆಗೆ ಮುಕ್ತಗೊಳಿಸುವ ಕೆಲಸ ಆಗಬೇಕಿದೆ. ಜತೆಗೆ ದೇವಸ್ಥಾನದ ಸುತ್ತಮುತ್ತ ಸ್ವಚ್ಛತೆ ಕೈಗೊಂಡು ಕೊಳಚೆ ನೀರು ಸರಾಗವಾಗಿ ಹರಿದುಹೋಗಲು ಸೂಕ್ತ ವ್ಯವಸ್ಥೆ ಕಲ್ಪಿಸಬೇಕಿದೆ.
ಸ್ವಚ್ಛ ಭಾರತ ಅಭಿಯಾನದ ಬಗ್ಗೆ ಜಾಗೃತಿ ಮೂಡಿಸುವ ಸಂದರ್ಭದಲ್ಲಿ ಗ್ರಾಮದ ಧಾರ್ಮಿಕ ಸ್ಥಳದ ಎದುರೇ ಕೊಳಚೆ ನೀರು ಹರಿಯುತ್ತಿರುವುದು ವಿಪರ್ಯಾಸವೇ ಸರಿ.
ಪಕೀರಪ್ಪನ ಪಾಳ್ಯದ ಸೇವಾಲಾಲ್ ಭವನ ಪೂರ್ಣಗೊಳ್ಳುವುದು ಯಾವಾಗ? ದೇವಸ್ಥಾನದ ಸುತ್ತಮುತ್ತ ಸ್ವಚ್ಛತೆ ಕಾಪಾಡಲು ಪಂಚಾಯಿತಿ ಆಡಳಿತ ಯಾವಾಗ ಕ್ರಮ ಕೈಗೊಳ್ಳಲಿದೆ? ಸಂಬಂಧಪಟ್ಟ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳು ಇನ್ನಾದರೂ ಇತ್ತ ಗಮನಹರಿಸುವರೇ ಎಂಬುದು ಗ್ರಾಮಸ್ಥರ ನಿರೀಕ್ಷೆ.
